昨天行了一天動植物公園，今天立刻安排一次shopping同食食食的行程，平衡一下。心齋橋是到大阪市必去的旅遊購物區之一，既然來到大阪，當然都要拜會一下。
由大國町搭到心齋橋只需要兩個站，真係想唔識去都唔得。一落地鐵，搵到出口通往心齋橋，一出到就位於心齋橋的Luke"s Lobster店。之前見過有網友介紹過龍蝦包好食，所以老公都買一個試下。
店舖小小但人流都算不斷，生意甚好：
老公買左一個regular的龍蝦包，980 yen，大約HK$70：
龍蝦的確新鮮好味，但未致於好吃得不得了，而且秒速就食完，性價比之下好像有貴點。
當然要到此一遊：
經過見到一間寵物店，狗仔好可愛好活潑，好似生活得好舒服咁~~
環境十分乾淨，店外註明不歡迎外國人內進，本來想入內睇睇，但還是決定不要運吉。雖然我無入去深入睇下，但真心覺得日本的寵物店特別吸引，乾淨舒適的環境令到小狗小貓也特別精靈，這些差別，只在於做多一點、貼心多一點。
行了一陣，大家都有點攰，BB也是時候吃東西，所以揀了一間網民讚過好味，又剛巧路過的一間餐廳 - 磯丸水產：
我們是在下午茶時間入內，人不多。這裡的裝潢很有特色，後來發覺大阪很多食店的裝潢也是很有個性及心思的：
網民大讚磯丸水產的美食就是左邊這個釀蟹蓋：
網民說好好食，每次來都會食：
雖然我對蟹有敏感，還是試了一小口，試一試傳聞中的好好食是什麼味道。一試，是一種非常濃郁的味道，吃兩三啖就夠哂，而個人認為未致於好吃到會一食再食，但未食過可以試下，感覺像濃郁蟹膏吞拿魚醬……
既然都入到黎，無理由只食釀蟹蓋，叫了個清酒煮元貝…味道無乜…又有點沙…不好味…
因為我好鍾意食刺身，所以揀左個刺身飯，可惜味道一般，刺身有筋，浪費了我個胃既容量…
再點一個海曼丼…噢…肉質鬆散，不好吃，只是味道還可以…
叫了一個刺身拼盆，價錢不貴，但得個樣，大部分都不合格，普通過普通，像食放題的質素，又浪費了我在日本食刺身的quota……
食飽又再行，其實心齋橋真係有好多藥妝店，間間都差不多，所以行行下我地都無再睇藥妝店，然後行行下已經離開左心齋橋筋，去到另一條橋，但另一條橋賣的物品都好舊式…唔係好舊式既日本feel，而係好舊式既內地feel，完全唔入流，但就見到呢個櫻餅：
我對呢間丹波屋有點興趣，賣的小食好有日本特色：
買了紅豆餅及燒糯米餅，糯米很煙韌很有咬口，米味香，都幾好味，但好味既原因一定係原材料好。我相信同樣的店舖有比這間更好食的，但在附近沒發現類近。
回到心齋橋，見到這間宇治園的軟雪糕好像很好味，就買一杯試下。
平時我們絶對不會給希仔食雪糕，但這間宇治園的軟雪糕似乎好正咁，所以就准許希仔食一啖咁多，綠茶味的確十足，雪糕質感亦軟滑。不過我本身對綠茶產品無偏好，所以就覺得試一次就OK，也不會有想再吃的衝動。
邊食雪糕邊行心齋橋的另一面，終於由天光行到天黑，到了這個招牌中央廣場位置，見到glica的廣告牌：
路過心齋橋其中一間小商廈地下，有人派傳單，見到有夾公仔機的圖樣，仲有coupon可以免費試夾公仔。本身一心諗住在日本試夾公仔、沿途都注意有無公仔夾，所以當我見到張傳單立刻眼前一亮：嘩﹗上去睇下囉﹗
如是者，就玩左個幾鐘夾公仔，當中的職員會幫手提示，又會再搬一搬公仔的位置，100 yen夾一次，有兩個夾左六、七次就夾到，有一個就夾了十幾次，大約花費了二千幾yen就夾到三個又大又靚我地又鍾意的公仔，質地仲好好﹗
夾完公仔，不知不覺就到宗右衞門町，我們就在這條街找了一間燒肉店吃晚飯:
路過出名的蟹道樂，網上人人讚好味，可惜我本身對蟹敏感，所以老公都唔考慮這裡吃晚飯。
最後決定食宗右衞門町的道頓堀炭火燒肉：
炭爐呀~~
A5和牛呀~~~來到日本怎樣也要試下的~
雖然這店沒有神戶牛排或者神戶牛可以食，但試一下這裡的A4A5和牛都好呀﹗
點了一杯黑啤，還有冰水可以飲~
先來一份堂食附送的馬肉刺身…賣相很像parma ham呢…而味道就無parma ham那般香口。食到最後我們把刺身放在炭爐上燒，燒熟了好味過生食。
A4和牛到啦~~~嘩~單單睇外表已經好得﹗好新鮮色澤好靚﹗
然後就到滿心期待的A5和牛啦~~同樣新鮮，明顯地多點肥肉~~
炭爐燒牛：
慢慢燒~~
初次試的是A4和牛，雖未致於入口即溶，但牛味十足，肉質嫩滑，足以一邊食一邊讚好﹗再食A5和牛，分別在於牛的油脂更豐，更重的牛油口感，可惜肉裡有筋，咀嚼後有點渣。原來A4和牛比A5更好味，而且更便宜。
飯後向相合橋筋方向走向大國町站當散步：
見到有人擺一些地攤表演魔術：
回到民宿，即攞三隻公仔比希仔玩，仲放隻叮噹陪瞓~~
又一日，今日真係好滿足~
待續……
沒有留言:
張貼留言